១. តើទំហំ​វិនិយោគសរុប​ប៉ុន្មាន​ដែរ? ទំហំ​ជំនួយ​ប៉ុន្មានដែរ?

ច. ទំហំវិនិយោគសរុប​គឺ ៥២៤,៤៣៤ដុល្លារ។ ទំហំ​ជំនួយ ១៥០,០០០ ដុល្លារ​។ ក្រៅពី​នេះ​ទៀត វាមាន​ប្រាក់ ៥,៥០០​ ដុល្លារយ៉ាង​ច្រើន​បំផុត ​សម្រាប់​ការគូសប្លង់លម្អិត និង​ ការគណនាបង្គុំ​​ សម្រាប់អាង​ប្រព្រឹត្តិកម្ម និង​ អាង​ស្តុកទឹក។

២. តើ 3iមានលក្ខខណ្ឌណាមួយ​សម្រាប់​អ្នក​ដេញថ្លៃ​ឈ្នះ​ ក្នុង​ការ​ជ្រើសរើសក្រុមហ៊ុន​សាងសង់​ដែរ​ឬទេ?

ច. អ្នក​ដេញថ្លៃ​ ជាអ្នក​មាន​សិទ្ធ និង​សម្រេចទាំង​ស្រុង​ក្នុង​ការ​ជ្រើសរើស​ក្រុមហ៊ុន​សាងសង់​។ ប៉ុន្តែ 3iមានលក្ខខណ្ឌមួយ​ចំនួន​ទាក់​ទង​នឹង ពលកម្ម​កុមារ​ ក៏ដូចជា លក្ខខណ្ឌ​សុវត្ថិភាពការងារ សម្រាប់​អ្នកដេញថ្លៃ​នោះ​តម្រូវ​ឲ្យ​ ក្រុមហ៊ុន​សាងសង់​គោរពតាម។

៣. តើអ្នក​ដេញថ្លៃ​ អាច ស្នើ​ទំហំ​ទុយោ​ផ្សេងពីអ្វី​ដែល​បានដាក់​ក្នុង​របាយការណ៍​សិក្សាសមិទ្ធិលទ្ធភាព ក៏​ដូចជា​ប្រើ​ទុយោ PVC ឬទេ?

ច. អ្នក​ដេញ​ថ្លៃ​ អាច​មាន​សិទ្ធ​កែប្រែ​ទាំង​ស្រុង​ពី​អ្វី​ដែល​បាន​ដាក់ក្នុងរបាយការណ៍​សិក្សាសមិទ្ធិលទ្ធភាព ទៅតាម​ការយល់​ឃើញ​របស់​ខ្លួន។ ​ទំហំ​ទុយោ​ដែល​ធំ​ជាង​តែង​តែ​អាច​ទទួល​យកបាន​ ប៉ុន្តែ​មិន​មាន​ការបន្ថែម​លុយ​ជំនួយ​ទេ។  3i នឹង​ធ្វើ​ការវាយ​តម្លៃ​ ថា​តើ​អ្វី​ដែល​បាន​ស្នើដោយ​អ្នក​ដេញថ្លៃ​នោះ​ អាច​មាន​សមត្ថភាព​ផ្គត់ផ្គង់​ទឹក​ស្អាត​ដល់​ប្រជាជនដែល​ស្រប​ទៅតាម​តម្រូវ​ការ​ក្រសួង​ឧស្សាហកម្ម និង សិប្បកម្មឬទេ។ ចំពោះ ប្រភេទ​ទុយោ PVC វិញ ជា​ទូទៅ​ក្រសួង​ឧស្សាហកម្ម និង​សិប្បកម្ម​លើក​ទឹក​ចិត្ត​ និង​តម្រូវ​ឲ្យ​សេវាករ​ទឹកស្អាត​ប្រើប្រាស់ ទុយោ HDPE ព្រោះ​វា​ធន់​ជាង មិន​ងាយខូច ហើយ​ ពេល​គេ​ធ្វើ​ថ្នល់ សេវាករ​លើ​លើក​ទុយោ​ អាច​ជៀស​វាង​ការ​ខូច​ខាត​ពី​។

៤. ពេល​ជីក​បណ្តាញ​ទុយោ វា​អាចប៉ះពាល់​ដល់​ទី​ធ្លា​មុខ​ផ្ទះ​ប្រជាជន តើ​ក្រសួង​ឧស្សាហកម្ម និង 3i មានការ​អន្តរាគមន៍ ឬ​ សម្រប​សម្រួល​ដែរ​ឬទេ?

ច. អ្នក​ដេញ​ថ្លៃ​ឈ្នះ​ ជា​មា្ចស់​អាជីវកម្ម នឹងទទួល​ខុសត្រូវ​ទាំង​ស្រុង​លើ​ប្រតិបត្តិការ​អាជីវកម្ម​របស់​ខ្លួន។ ក្រៅ​ពីនេះ ដើម្បី​អាច​យក​ឃុំ​នេះ​ មក​ដាក់​ដេញថ្លៃ​បាន​ វាមានការ​ឯកភាព​ពី អាជ្ញាធរមូលដ្ឋាន​ដូច​ជា មេឃុំ សាលាខេត្ត និង មន្ទីរឧស្សាហកម្ម​ ក៏ដូច​ជា​ ក្រសួងឧស្សាហកម្ម។

៥. តើ​ វាអាចមាន​ប្រភពទឺក​ណាផ្សេង​ក្រៅពី​ ទន្លេ​សាប​ដែរ​ឬទេ?

ច. អ្នក​ដេញ​ថ្លៃ អាច​ស្នើ​ប្រភព​ទឹក​ផ្សេង តែវាត្រូវ​តែ​ធានា​ដល់​ការ​ផ្គត់​ផ្គង់​ទឹក​រយៈពេល​ពេញ​មួយ​ឆ្នាំ ព្រម​ទាំង​មាន​ផល​ប៉ះ​ពាល់​តិច​បំផុត​ដល់​អ្នក​ប្រើ​ប្រាស់​ប្រភព​ទឹក​ដទៃ និង បរិស្ថាន​។

៦. តើ​ ជំនួយ​របស់​3i នឹងត្រូវបាន​ផ្តល់​ឲ្យ​ដោយ​របៀប​ណា?

ច. ជំនួយ​​3i ផ្តល់​ឲ្យ​តាម​រយៈ​កិច្ចសន្យាផ្អែក​លើ​សមិទ្ធិផល។​ ឧទាហរណ៍​ថា ក្នុង​កិច្ច​សន្យា​រវាង ​សេវាករ​និង3i បានកំណត់​យក បីដំណាក់កាលនោះ។ នៅ​ពេលដែល​សេវាករ​បញ្ចប់​ដំណាក់​កាល​ទី​១នោះ 3i នឹងធ្វើ​ការ​វាយ​តម្លៃ​ថា​ សមិទ្ធិផល​ជាក់​ស្តែង​នោះ គោរព​តាម​អ្វី​ដែល​បាន​ដាក់​ក្នុង​កិច្ច​សន្យាឬ​ទេ។ បើ​គោរព​តាម​ 3i នឹង​ផ្តល់​ថវិការ​ឲ្យដូចដែល​បាន​ឯកភាព​ក្នុង​ដំណាក់កាល​ទី១នោះ​។

៧. តើ​ទំហំ​ជំនួយ​សម្រាប់​ដំណាក់​កាល​ទីមួយ​មាន​ប៉ុន្មាន​ភាគរយ?

ច.​ មិនមាន​ការ​កំណត់​ជាមុន​ឡើយ​ សម្រាប់​ទំហំ​ជំនួយ​សម្រាប់​ដំណាក់​កាលនីមួយៗ។​ ទំហំ​ជំនួយ​ សម្រាប់​ដំណាក់កាល​នីមួយៗ អាស្រ័យ​លើ​ទំហំ​វិនិយោគ​ដែល​ក្រុមហ៊ុន​ធ្វើ​ឡើង​ក្នុង​ដំណាក់​កាល​នោះ។ ក្រុមហ៊ុន បោះ​ទុន​កាន់​តែ​ធំចំពោះ​ដំណាក់កាល​ទីមួយ ទំហំ​ជំនួយ​ក៍​ធំ​តាម​នោះ​ដែរ។

៨.​ ខ្ញុំ​ ចង់​សង់​អាង​ប្រពឹត្តិកម្ម​ធំ​ជាង​ និង តំឡើង​ប្រព័ន្ធ​សូឡា។ តើ​3i នឹង​ផ្តល់ជំនួយ​បន្ថែម​ដែរ​ឬទេ?

ទំហំ​ហេដ្ឋារចនាសម្ព័ន្ធ ដែល​ស្នើ​ដោយ​​ 3i​ គឺគ្រប់គ្រាន់សម្រាប់​ចែកចាយ​ទឹក​ដល់​ប្រជាជន​ក្នុង​ឃុំ។ ប្រសិន​បើ ក្រុមហ៊ុន​ចង់​សង់ប្រព័ន្ធ​ហេដ្ឋារចនាសម្ព័ន្ធ​ធំ​ជាង ឬ ល្អជាង ក្រុមហ៊ុន​អាច​ធ្វើបានតែ ​ 3i នឹង​មិនផ្តល់ជំនួយ​បន្ថែម​ឡើយ។

ដោយ​ឡែក​ចំពោះប្រព័ន្ធ​សូឡា​វិញ ​​ 3i អាច​នឹង​ពិចារណាផ្តល់​ថិវិការ​ជំនួយបន្តិច​បន្តួច​បន្ថែម។

៩. តើ​រយៈពេល​នៃ​កិច្ច​សន្យា មាន​ពេល​ប៉ុន្មាន​ដែរ?

ច. ជាគោលការណ៍ វាមាន​​រយៈពេល​ ១៨​ខែ។

១០. ​តើ​ខ្ញុំ​អាច​បញ្ជាក់​ថា​អាច​មាន​ទុន​វិនិយោគតិចបំផុត35%ដោយ​របៀប​ណា?

ច. អ្នក​ អាច​បង្ហាញ​ភស្តុតាង​​តាមរយៈ​របាយការណ៍​ហិរញ្ញវត្ថុ​របស់​គណនី​អ្នក​ ដែល​អាច​ជា​គណនីបញ្ញើ​សំចៃ (គណនី​ដែល​អាច​ដក​ឬ​ដាក់​ប្រាក់​បាន​គ្រប់​ពេល​វេលា) ឬ​ គណនី​មាន​កាលកំណត់។ អ្នក​ក៏​អាច​ប្រើ​ប្រាស់​អចលន​ទ្រព្យ​ដែល​មាន​វិញ្ញាបណ្ណប័ត្រ​ ឬ​លិខិត​បញ្ជាក់​ត្រឹមត្រូវ។

១១. ខ្ញុំ​មាន​អាជីវកម្ម​លក់​ម៉ូតូ និង​ លក់​ទឹក។ តើ​ខ្ញុំ​អាច​យក​ទ្រព្យ​សកម្ម​ពី​អាជីវកម្ម​ទាំង​នោះ​ មក​ប្រើ​ជា​សំអាង​សម្រាប់​ទុន​វិនិយោគតិចបំផុតឬ​ទេ ដែល​មាន​ដូច​ជា ម៉ូតូ និង អាង​ប្រព្រឹត្តិកម្ម​ជាដើម?

ច. ទេ អ្នក​មិន​អាច។

១២. ខ្ញុំ​ មាន​ផ្ទះ​ដែល​កំពុង​ដាក់​ជា​ទ្រព្យ​ធានា​នៅធានាគារ។ តើ​ ខ្ញូំ​អាច​យក​វា​ជា​សំអាង​សម្រាប់​ទុន​វិនិយោគតិចបំផុតឬ​ទេ?

ច. ទេ អ្នក​មិន​អាច។

១៣. តើ​ 3iបាន​ធ្វើការ​សិក្សា​សមិទ្ធិលទ្ធភាព​ហើយ​ឬ​នៅ​?

3i បាន​ធ្វើការ​សិក្សា​រួច​រាល់​ហើយ។ លោក​អ្នក​អាច​ស្វែង​រក​របាយការណ៍​សិក្សា​សមិទ្ធិលទ្ធភាព​នៅ​ក្នុង​ កញ្ចប់​ដេញ​ថ្លៃ ដែល​លោក​អ្នក​អាច​រក​ទិញ​បាន​ពី​ក្រសួង​ឧស្សាហកម្ម និង​សិប្បកម្ម។ លោក​អ្នក​ក៍​អាច​ទាញយក​វាពី​គេហទំព័រ​3iក៏បាន។

១៤. តើ​នៅ​ពេល​ណា ខ្ញុំ​អាច​ដក​ប្រាក់ ៥,០០០​ដុល្លារ ដែល​ស្ថិត​នៅក្រោម​ការធានា​ពី​ធានាគារ?

ប្រសិន​បើអ្នក​ចាញ់​ការ​ដេញ​ថ្លៃ អ្នក​អាច​ដកប្រាក់​ ៥,០០០ ដុល្លារ​បាន។

១៥. នៅ​ពេល​ខ្ញុំ​ឈ្នះ​ការ​ដេញថ្លៃ តើ​ខ្ញុំនឹង​ទទួល​បាន​ប្រកាស​អនុញ្ញាត​ដោយ​ស្វ័យ​ប្រវត្តិឬទេ?

តំណាង​គណកម្មការ​ និង​ គណកម្មការក្រសួងជា​អ្នក​សម្រេច​ជ្រើស​រើស​អ្នក​ឈ្នះ។ ដូច្នេះ​ នៅ​ពេល​អ្នក​ឈ្នះ​ការ​ដេញ​ថ្លៃត្រូវបាន​ប្រកាស​ជា​ផ្លូវការនោះ អ្នក​ឈ្នះ​ជា​អ្នក​ទទួល​ប្រកាស​អនុញ្ញាត។

១៦. តើ​នឹងមាន​អ្វី​កើត​ឡើង ប្រសិន​បើ​ខ្ញុំ​ជ្រើស​រើស​ទុយោ​មាន​ទំហំ​តូច​ជាង​មុន?

អ្នក​ដេញថ្លៃ អាចស្នើ​ទំហំ​ទុយោ និង​ផ្នែក​ផ្សេងៗ​ទៀត​នៃ​ហេដ្ឋារចនាសម្ព័ន្ធ ខុសពី​អ្វី​ដែល​បាន​ស្នើ​ក្នុង ​របាយការណ៍​សិក្សា​សមិទ្ធិលទ្ធភាព។​ 3i​ នឹង​ត្រួតពិនិត្យថាតើ​ អ្វី​ដែល​បាន​ស្នើ​នោះ​ឆ្លើយ​តប​ទៅនឹងបទដ្ឋាន​ របស់​ក្រសួងឧស្សាហកម្ម​ឬ​ទេ​ និង​អាច​ចែក​ចាយ​ទឹក​ប្រកប​ដោយ​សម្ពាធ​គ្រប់​គ្រាន់​ដែរ​ឬទេ។ ប្រសិន​បើ​វា​ឆ្លើយ​តប និង អ្នក​ដេញ​ថ្លៃ​នោះ​ឈ្នះ 3iនឹង​អាច​កាត់​បន្ថយ​ថវិការ​ជំនួយ​ទៅ​តាម​តម្លៃ​ជាក់​ស្តែង​ដែលបាន​ថយចុះ។

១៧.​ ប្រសិន​បើមាន​អ្នក​ដេញ​ថ្លៃ​២នាក់​ស្នើ​ថ្លៃ​លក់​ទឹក​ដូចគ្នា តើ​គេ​ធ្វើ​ម៉េច​ដើម្បី​ជ្រើសរើស​អ្នក​ឈ្នះ?

ប្រសិន​បើមាន​អ្នក​ដេញ​ថ្លៃ​២នាក់​ស្នើ​ថ្លៃ​លក់​ទឹក​ដូចគ្នានោះ តំណាងគណកម្មការ​នឹង​សម្រេច​ដោយ​ផ្អែកលើ​ ថ្លៃ​តំណ។ ប្រសិន​បើមាន​អ្នក​ដេញ​ថ្លៃ​២នាក់​ស្នើ​ថ្លៃ​តំណដូចគ្នានោះ តំណាងគណកម្មការ​នឹង​ពិនិត្យ​ទៅ​លើ ថ្លៃតំហែ​ទាំនាឡិកា ប្រាក់កក់ និង​ ថ្លៃ​តំណឡើង​វិញ។

១៨. ថ្លៃលក់​ទឹក​អាច​ធ្លាក់​ចុះ​ពី​ឆ្នាំ​ទី​១ដល់​ទី​៥ អញ្ចឹងតើ​គេអាច​ជ្រើស​រើស​អ្នក​មាន​ថ្លៃ​លក់​ទឹក​ទាប​យ៉ាង​ដូចម្តេច?

គេប្រើ​វិធី​មធ្យមភាគ​ថ្លៃ​ទឹក​រយៈពេល​៥​ឆ្នាំ។

១៩.​ តើ​ធានាគារ​ណាខ្លះ​អាច​ចេញ​លិខិត​ធានា​៥,០០០​ដុល្លារបាន?

អ្នកអាច​ស្វែងរក​សេវាកម្ម​លិខិតធានា​ពី​គ្រប់​ធានាគារពាណិជ្ជ​ទាំង​អស់។ នៅ​ក្នុង​ជុំ​ដេញ​ថ្លៃ​មុនៗ​ គេឃើញមាន​លិខិត​ធានា​សម្រាប់​ការ​ដេញ​ថ្លៃ​ចេញ​ដោយ​ធានាគារ​អេស៊ី​លីដា ប៉ុន្តែ​លោក​អ្នក​អាច​សួរ​រក​សេវា​នេះ​ពី​ធានាគារ   ​ផ្សេងៗ​តាម​ការគួរ និងបង្ហាញពី​ទម្រង់​គំរូ​ពី​លិខិត​ធានា​នោះ។

២០. សម្រាប់​ទីតាំងនេះ ទុយោនាំ​យក​ទឹក​ឆៅ​រត់កាត់​ឃុំ​ដែល​ស្ថិត​នៅ​ក្នុង​អាជ្ញាប័ណ្ណរបស់​អ្នក​ដទៃ។ តើ​វា​អាច​ទៅ​រួច​ឬ​ទេ?

មន្រ្តី​ក្រសួង​ឧស្សាហកម្ម បាន​ពន្យល់ថា វាមិន​មាន​បញ្ហា​នោះ​ទេ កុំឲ្យ​តែចែក​ចាយ​ទឹក​នៅ​តំបន់​អាជ្ញាប័ណ្ណ​គេ។

២១. វាមាន​តម្រូវឲ្យ​មាន​ទុន​វិនិយោគ​អប្បបរមា៣៥% នៃ​វិនិយោគ​សរុប។ ប្រសិន​បើ​មាន​អ្នក​មិន​ឆ្លើយ​តប​នឹង​លក្ខខណ្ឌនេះ តើ​គេ​អាច​ដាក់​ពាក្យ​ដេញ​ថ្លៃ​ដែរ​ឬទេ?

ទេ គាត់​មិន​ដាក់​ពាក្យដេញថ្លៃ​ឡើយ។ មូលហេតុ​តម្រូវ​ឲ្យ​មាន ៣៥%​នៃ​ទុន​វិនិយោគ​សរុប​គឺ ដើម្បី​ធានា​ថា​អ្នក​វិនិយោគ​មាន​ទុន​គ្រប់​គ្រាន់​ក្នុង​ការ​កសាង​ហេដ្ឋារចនាសម្ព័ន្ធ​សម្រាប់​តំបន់​សេវា​ទាំង​មូល​ក្នុង​រយៈពេល​៥ឆ្នាំ​ ដែល​តម្រូវ​ដោយ​ក្រសួង។

២២. តើ​អ្នក​ដេញ​ថ្លៃ​អាច​ស្នើ​សុំ​ថ្លៃ​ទាប​ជាង​ថ្លៃ​ដែល​កំណត់​ដែរ​ឬ​ទេ?

ទេ គាត់​មិន​អាច​ដាក់​ថ្លៃ​ខុស​ពី​ថ្លៃ​ដែល​កំណត់​ទេ។ គាត់​នឹង​ត្រូវ​ធ្លាក់​ពី​ការ​ដេញ​ថ្លៃ។

២៣.​ តើ​ ទុនវិនិយោគ​ដែល​បាន​ស្នើ​ក្នុង​របាយ​ការណ៍​សិក្សា​សមិទ្ធិលទ្ធភាព​ បាន​គិត​ពី​ពន្ធលើ​តម្លៃ​បន្ថែម (VAT)?

ទុន​វិនិយោគ ដែល​បាន​ស្នើ​ក្នុង​របាយ​ការណ៍​សិក្សា​សមិទ្ធិលទ្ធភាព ជា​តម្លៃ​ប៉ាន់​ស្មាន​ដោយ​ផ្អែក​លើ​តម្លៃ​ផលិតផល​លើ​ទី​ផ្សារ។ ដូច្នេះ វាបាន​គិតពី​ពន្ធលើ​តម្លៃ​បន្ថែម (VAT) រួច​ស្រាច់​ហើយ។ សូម​បញ្ជាក់​ថា តម្លៃ​ទាំង​នោះ ជា​តម្លៃ​ប៉ាន់​ស្មាន​ប៉ុណ្ណោះ។ ដូច្នេះ​ សូម​អ្នក​ដេញ​ថ្លៃ​ផ្ទៀង​ផ្ទាត់ដោយ​ខ្លួន​ឯង​តាម​តម្លៃ​ទីផ្សារ។

២៤.​ ប្រសិន​បើ អ្នក​ឈ្នះ​ការ​ដេញថ្លៃ​មិន​ទទួល​យក​លទ្ធផល​ តើ​អ្នក​ឈរ​លេខរៀង​ទី២​អាច​ក្លាយ​ជា​អ្នក​ឈ្នះ​ការ​ដេញ​ថ្លៃ​ដែរ​ឬ​ទេ?

មន្ត្រី​ក្រសួងឧស្សាហកម្ម បាន​ពន្យល់​ថា​ ជា​គោល​ការណ៍​គេ​នឹង​ធ្វើ​ការ​ដាក់​ដេញ​ថ្លៃ​ម្តងទៀត ដើម្បី​ជៀស​វាង​ការ​រួម​គំនិត​គ្នា រវាង​អ្នក​ដេញ​ថ្លៃ​ទាំង​ពីរ។​

២៥. តើ​3i គណនា​តម្លៃ​សារធាតុ​គីមី​ដោយ​របៀបណា?

វា ពឹង​ផ្អែក​លើ​ការសន្មត​ជា​ស្តង់ដា​ សម្រាប់​ក្រុមហ៊ុនអាជីវកម្ម​ទឹក​ស្អាត។ ដើម្បី​កសាង​ការសន្មត​នេះ 3iបាន​ធ្វើការ​សិក្សា​លើ​ទីផ្សារ​ និង​សម្ភាសក្រុមហ៊ុន​មួយ​ចំនួន។ សូម​បញ្ជាក់​ថា តម្លៃ​ទាំង​នោះ ជា​តម្លៃ​ប៉ាន់​ស្មាន​ប៉ុណ្ណោះ។ ដូច្នេះ​ សូម​អ្នក​ដេញ​ថ្លៃ​ផ្ទៀង​ផ្ទាត់ដោយ​ខ្លួន​ឯង។

២៦. តើ​អ្នក​ឈ្នះ​ការ​ដេញ​ថ្លៃ​ អាចផ្ទេរ​អាជ្ញាប័ណ្ណ​ដល់​អ្នក​ផ្សេង​ដែរ​ឬ​ទេ?

ក្រសួង​ឧស្សាហកម្ម​ ជា​អ្នក​សម្រេច​ថា​តើ​អាជ្ញាប័ណ្ណ​នោះ​អាច​ផ្ទេរ​បាន​ឬ​មិន​បាន។ ដោយ​ឡែក​កិច្ចសន្យា​ផ្តល់​ជំនួយ​ ដែល​ធ្វើ​ឡើង​រវាង​អ្នក​ឈ្នះ​ការ​ដេញ​ថ្លៃ និង​3i មិន​អាច​មាន​ផ្ទេរ​នោះ​ទេ​ លុះ​ត្រាតែ​​ មាន​ការ​ជូន​ដំណឹង​ដល់​ 3i​ជាមុន មុន​ពេល​ចុះ​កិច្ច​សន្យា។

២៧. ក្នុងរយៈពេល​៥ឆ្នាំ ប្រសិន​បើ​អ្នក​ឈ្នះ​មិន​អាច​គ្របដណ្តប់​គ្រប់​ភូមិក្នុង​តំបន់​សេវាកម្មនោះ​ទេ តើ​ក្រសួងឧស្សាហកម្ម​នឹង​ដក​យក​ប្រកាស​អនុញ្ញាត​វិញ​ដែរ​ឬ​ទេ?

មន្ត្រីក្រសួង​ឧស្សាហកម្ម​បាន​ពន្យល់​ថា បើតាម​ច្បាប់​ក្រសួង​អាច​ដកហូត​ប្រកាស​បាន​។ ប៉ុន្តែ​ តាម​ការ​អនុវត្ត​ជាក់​ស្តែង​កន្លង​មក ក្រសួង​នឹង​ចុះ​ទៅ​ត្រួ​ត​ពិនិត្យដល់​ទី​កន្លែង សិក្សា​ពី​ការ​វិវឌ្ឍ និង ស្វែង​យល់​ពី​ឧបសគ្គ​ជាក់​ស្តែងនៅ​ក្នុង​តំបន់។

២៨. បើ​តាម​ក្រសួង​ឧស្សាហកម្ម អ្នក​ឈ្នះ​ការ​ដេញ​ថ្លៃ​ត្រូវ​សង់​បញ្ចប់​ហេដ្ឋារចនាសម្ព័ន្ធ​ក្នុង​រយៈ​ពេល​៥​ឆ្នាំ។ ប៉ុន្តែ កិច្ចសន្យា​ជំនួយ​ជាមួយ​3iធ្វើ​ឡើង​ក្នុង​រយៈ​ពេល​១.៥​ឆ្នាំ​ប៉ុណ្ណោះ។ ហេតុអ្វី​​ បាន​ជា​វា​ខុសគ្នា​អញ្ចឹង?

3i មិន​តម្រូវ​ឲ្យ​អ្នក​ឈ្នះ​បញ្ចប់​ការ​សាងសង់​ហេដ្ឋារចនាសម្ព័ន្ធ​ទាំង​ស្រុង​ មុន​ពេល​ 3i ផ្តល់​ថវិការ​ជំនួយលើក​ចុង​ក្រោយ​ឡើយ។ ក្នុង​ការបង្កើត​កិច្ច​សន្យា អ្នក​ទទួល​ជំនួយ​ និង 3i នឹងឯកភាព​គ្នា​លើ​ ដំណាក់កាលផ្តល់​ជំនួយ​ និង សមិទ្ធិផល​ក្នុងដំណាក់កាល​នីមួយៗ ដែល​មាន​ភាព​ប្រាកដនិយម។

២៩. សម្រាប់​ថ្លៃ​លក់​ទឹក​នៅ​ឃុំ​ដែល​បាន​ដាក់​ដេញ​ថ្លៃ​កាល​ពី​ជុំ​មុនៗ តើ​អ្នកនឹង​បង្ហាញពី​លទ្ធផលនៃ​ការដេញ​ថ្លៃ​ដែរ​ឬទេ? ប្រសិន​បើ​ដូច្នោះ ពួក​យើង​ចង់​ដឹង​ពី​តម្លៃ​ទឹក​លក់​នៃ​ជុំ​ មុន​ៗ​នោះ។

ក្រសួង​ឧស្សាហកម្ម​និង​សិប្បកម្ម ជា​អ្នក​សម្រេច​ជ្រើស​រើស​អ្នក​ឈ្នះ និង​ជាផ្លូវការ​ប្រកាស​លទ្ធផលដែល​នឹង​បង្ហាញ​ផង​ដែរ​នូវ ថ្លៃ​លក់​ទឹក ថ្លៃ​តំណ​ និង​តម្លៃ​សេវា​ផ្សេងៗ​ទៀត។ សូម​ទាក់​ទង​ អគ្គនាយកដ្ឋាន​ទឹក​ស្អាត​ នៃ ក្រសួង​ឧស្សាហកម្ម​និង​សិប្បកម្ម។

៣០. តើ​លិខិតប្រាក់​កក់​ធានា​នោះ​មាន​សុពលភាព​ដល់​ពេល​ណា?

លិខិតប្រាក់​កក់​ គួរ​តែ​មាន​សុពលភាព​យ៉ាង​ហោច​ណាស់​ដល់​ថ្ងៃទី ១ កុម្ភៈ ឆ្នាំ​២០១៨។

៣១. វាមាន​ស្ទឹង​ក្រាំង​ពន្លៃ​ នៅ​ក្នុង​ឃុំ​ទំនប់​ធំ។ តើ​គេអាច​ប្រើប្រាស់​វា​ ជា​ប្រភពទឹក​ដែរ​ឬទេ?

ស្ទឹង​នេះ​ រីង​កាលពីឆ្នាំ​មុន ហើយ​វាហាក់​ដូច​ជា​មិនអាច​ក្លាយ​ជា​ប្រភព​ទឹកប្រកប​ដោយ​ចីរភាពនោះ​ឡើយ។ ឃុំ​ស្ថិត​នៅ​ផ្នែក​ខាង​ក្រោម​បំផុត​នៃ​ស្ទឹង​ ហើយ​វាមាន​ទ្វារ​ទឹក​តាម​ទំនប់​ជាច្រើននៅផ្នែក​ខាង​លើ​នៃ​ស្ទឹង។

៣២. តើ​ឃុំ​ទំនប់​ធំ​ អាច​បញ្ចូល​គ្នា​ជាមួយ​នឹង​ឃុំណាមួយ​ផ្សេង​ទៀត​ទេ?

វាមាន​ឃុំ​ម្កាក់​ដែល​នៅ​ក្បែរ​នោះ​ ដែល​អាច​បញ្ចូល​គ្នា​បាន។

៣៣. ហេតុអ្វី​បាន​ជា​ សមត្ថភាព​ម៉ូទ័រ​បូម​ទឹក​ឆៅ​ធំ​ជាង​សមត្ថភាព​ម៉ូទ័រ​រុញ​ទឹក?

វាមាន​ហេតុផល​២យ៉ាង។ ទីមួយ​ ប្រវែង​ទុយោ​ទឹក​ឆៅ​ដែល​ភ្ជាប់​អាង​ប្រពឹត្តកម្មទៅ​នឹង​ប្រភព​ទឹក​មាន​ចម្ងាយវែង។ ទី​ពីរ គឺ​នៅ​តាម​ផ្លូវ​នោះ វាមាន​ទួលជាច្រើន។​

៣៤. ប្រសិនអ្នកដេញថ្លៃឈ្នះការដេញថ្លៃ ចង់ស្នើរសុំពង្រីកតំបន់សេវាកម្មទៅឃុំដែលនៅជាប់ឃុំទំនប់ធំ តើ​3iនឹងផ្តល់ជំនួយបន្ថែមទៀតទេ?

ចាស 3i អាចពិចារណាផ្តល់ថវិការជំនួយបន្ថែមប្រសិនអ្នកឈ្នះ ចង់គ្របដណ្តប់តំបន់សេវាកម្មដែលធំជាងមុន។ 3i នឹង​ប្រើប្រាស់​វិធីសាស្រ្ត​គណនាដូចមុនក្នុងការគណនាជំនួយ ហើយ​នឹង​ត្រូវ​ដាក់​សំណើរ​ទៅ​គណៈកម្មាធិការ​ត្រួតពិនិត្យ​របស់​ខ្លួន​ដើម្បី​អនុម័ត​ប្រសិន​ទំហំ​ជំនួយ​ប្រែប្រួល​ខ្លាំង។ 3i មិនអាចធានាថាអ្នកឈ្នះការដេញថ្លៃនឹងទទួលជំនួយន្ថែមនោះទេ។

Font Resize